Verðum sjálf að rannsaka hrunið

Viðtalið við Evu Joly í Silfri Egils í gær var mjög upplýsandi. Eva hefur greinilega mikinn áhuga á viðfangsefni sínu og hefur þann hæfileika á að hrífa fólk með sér. Hún hefur sérstakt lag á að setja hlutina fram á einfaldan hátt þannig að auðvelt er að skilja hana.

Skilaboð hennar eru mörg, m.a. að það sé nauðsynlegt að rannsaka svona mál, annars munu þau hvíla eins og mara á þjóðinni og trufla uppbyggingu samfélagsins. Rannsóknin verður erfið og það mun reyna mjög mikið á rannsakendur, dómskerfið og síðast en ekki síst fjölmiðla.

Í netheimum er nú margir búnir að undirrita skilaboð um að fá Evu Joly til að rannsaka hrunið, þar segir "Við treystum ekki innlendum rannsóknaraðilum sem skipaðir eru af þinginu til slíkra verka."

Því miður held ég að við eigum engra kosta völ. Við Íslendingar verðum að sjá um þetta verk sjálf, en að sjálfsögðu á að leita eftir aðstoð frá erlendum sérfræðingum. Við vitum að þegar við göngum sjálf í verkin lærum við mest. Við verðum að læra af þeim mistökum sem gerð voru til þessa að geta gert ráðstafanir til að forðast þau í framtíðinni. Með því að gera þetta sjálf, getum við lagt eitthvað af mörkum við að endurreisa traust á stofnunum samfélagsins, jafnframt því sem við byggjum upp þekkingu innanlands. Það mun reyna á fjölmiðla að miðla fréttum af rannsókninni og niðurstöðum hennar. Það mun reyna á okkur öll.

Eva Joly verður með opinn fyrirlestur í Háskólanum í Reykjavík á morgun þriðjudag. Ég verð þar.

heimasíða Rannsóknarnefndar Alþingis http://www.rannsoknarnefnd.is

Athugasemdir

[TARA, 9.3.2009 kl. 23:08]

Er alveg sammála þér um Evu Joly..hún er mjög hæfileikarík kona og skynsöm. Hún sagði margt mjög áhugavert og rósemi hennar gerir það að verkum að manni líður betur eftir að hafa hlustað á hana.

[Haraldur Haraldsson, 10.3.2009 kl. 18:28]

Halli gamli ættlar að styja þig,sammála þessu með rannsóknina/Kveðja Halli gamli

[Guðmundur St Ragnarsson, 13.3.2009 kl. 00:38]

Sæl Sigríður,

Hvar er gagnrýni ykkar sjálfstæðismanna á eigin forystu? Þið beygið ykkur og buktið í takt við forystu sem verður minnst sem leiðtoganna sem brenndu Ísland. Þið sem eruð að bjóða ykkur fram sem "endurnýjun", "breytingar" (og fleiri frasar eru notaðir) verðið að þora að segja þjóðinni hug ykkar. Þar hefur Sigurður Örn Ágústsson (býður sig fram í Norð-Vesturkjördæmi) sýnt gott foræmi.

En Eva Joly er mjög fær og góð. En það þurfti SJÓNVARPSMANN til að fá hana hingað!!!